Dankie my engel kind....

My liefste klein Superman....

Mamma loop nou al vir maande met 'n gevoel in my hartjie... Dis een van daai gevoelens wat moeilik is om te beskryf, aangesien dit te doen het met hartseer, verlange, geluk en liefde. Ek dink die woorde "mixed feelings" is die beste manier om dit te beskryf.

So baie gebeur elke week. Mamma wens sy kon elke oomblik op video sit. Elke dag gaan net te vinnig verby, en die slegste van alles is, mens vergeet soms om die klein oomblikke, wat eintlik die belangrikste is, te onthou.

Ons staan nader aan die einde van die jaar toe. Ons is moeg. Dit was 'n moeilike en lang jaar. Ek voel soms so skuldig, want wanneer jy moeilik is of huilerig is, vergeet ek soms dat jy ook maar net 'n klein mensie is. Jy kan ook 'n afdag hê, Jy kan soms moeg voel. Dalk was jou dag ook maar lank en wil jy net bietjie rustig wees. Mamma is jammer hieroor. Maar ek probeer my kind... ek belowe ek probeer altyd om jou beter te verstaan. Mamma het al agtergekom, wanneer ek na jou toe kruip terwyl jy op die bank sit en ek voor jou gaan staan op my kniee, helder jou gesiggie sommer dadelik op en begin jy gesels.

Ek is jammer mamma is nie altyd daar wanneer jy my nodig het nie. Ek wens daar het nie so iets soos kos maak, skoon maak en werk bestaan nie, want dan kan ek elke minuut van die 24 uur van 'n dag saam met jou sit en speel. Ek koester ons bad tye saam, want dis wanneer mamma die kans kry om vir jou te sing, jou klein toontjies een vir een te was en jou te kielie tot jy lag. Wanneer jy mamma so fliks help om my hare te was, voel ek skoon trots... Jy kan al so baie dingetjies self doen, maar wil altyd help. Of ons nou in die tuin werk, skottelgoed was of klere in die wasmasjien sit... Jy is altyd reg langs my, reg om te help. Jy is 'n regte ou staatmakertjie.

Mamma wees is nie maklik nie. God weet hoeveel keer het ek al hulpeloos gevoel. Nagte gaan om wat ek en Pappa nie slaap nie, want jy slaap nie lekker nie. As ek en Pappa so voel die volgende dag, wil mamma nie eers weet hoe jy moet voel nie na 'n onrustige aand nie. Jou klein lyfie is nie gewoond aan min slaap, lang dae en besige dae nie. Maar, vandag wil mamma jou vertel, hoekom ek dink, God jou gekies het, as my engel kind...

Mamma onthou 'n tyd wat ek gedink het, ek sal nooit my eie kinders hê nie. Daar was 'n tyd wat mamma meer gefokus was op werk en my loopbaan as op my eie doelwitte. Dan praat ek nie eers van die tyd wanneer my sosiale lewe met vriende elke dag 'n hoogtepunt was nie. Maar, diep binne in my hart, het mamma altyd geweet daar kort iets. Mamma het soms nagte om gebid en God gesmeek vir 'n perfekte man met wie ek my eie gesin kon hê. Ek het altyd gevoel, daar moet iets meer wees. Mamma het nooit gedink so klein bondeltjie liefde soos jy, sou soveel veranderinge in my lewe gebring het nie. (Mamma moet jou nog vertel, hoe ek en Pappa ontmoet het en hoe ons paaie weer na 12 jaar gekruis het. Al wat jy nou moet weet, is na ek pappa vir 12 jaar nie gesien het nie, het dit gevoel soos "love at first sight" toe ek pappa weer gesien het by die braai.)

My engel kind, jy gee moed wanneer mamma se daggie lank was of wanneer ek voel dinge is moeilik. Jy gee krag wanneer mens hulpeloos voel asof niks wil uitwerk nie. Jou armpies steek jy altyd uit na my toe, jou glimlag is aansteeklik. Jou ogies lag so lekker saam as jou mondjie smile. Jou handjie wat so perfek om my vingertjies vou wanneer jy my iets wil wys, los my soms spraakeloos. Soms dink ek, mamma het jou meer nodig as jy vir my. Ek kan nie my lewe indink sonder jou nie. Ek kan nie glo, dat hierdie liefies wat mamma in hart voel, bestaan nie. Dis daai tipe liefies wat net 'n mamma sal verstaan. Jou geselsies is my aanmoediging. Jy gee nie om of ek sommer net 'n storie opmaak en of ek iets uit 'n boek uit lees nie. Jy gesels saam. Jy beduie en lag... Dis so spesiaal my kind.

Dankie my engel kind, dat jy mamma se seuntjie kind is. Ek weet dit was God se plan en na al die jare was dit elke oomblik se wag werd gewees.

Dankie, dat ek altyd voel asof ek jou nommer een is. By jou sal ek altyd 'n plekkie hê. Of dit nou langs jou op die bank is, of wanneer mamma jou net wil vashou... By jou, voel mamma altyd tuis.

Dankie my kind, dat jy nie kwaad bly wanneer mamma moet raas nie. Jy vergewe my sommer dadelik en lê jou koppie neer op my skouer. Mamma is jammer as ek soms streng is, maar mamma wil net hê jy moet eendag as jy groot is, die beste mens wees wat jy kan wees en dat jy altyd sal weet wat "reg" en wat "verkeerd" is. Mamma kry soms net so seer as ek moet raas, want ek wil nie, maar ek weet ek moet. Seblief vergewe my altyd, maak nie saak hoe oud jy is of waaroor ek nog gaan raas nie.

Dankie my kind, dat jy mamma staande hou... Jou liefies weerspreek elke bietjie van jou persoonlikheid. Jou laggie is my daaglikste medisyne. Jy, is my rede vir nooit opgee nie. Vir altyd aanhou.

Dankie my kind, dat jy my hoop gee. Na jou ongeluk, het mamma geleer van geloof. Mamma het geleer dat God regtig egtig wonderwerke kan laat gebeur. Jy, so klein soos jy is, is die rede dat mamma geleer het, gebed is alles en dat mens enige tyd en elke dag moet bid.

Maar meeste van alles, dankie dat jy vir my soveel liefde en geluk gee. Mamma belowe, ek sal altyd net die beste mamma vir jou probeer wees.

Ek is baie lief vir jou my kind, sonder ophou, sonder einde.... elke dag. Vir altyd en nog 'n bietjie meer.

Jou mamma
xxx

Elke dag is 'n nuwe dag... 'n nuwe oomblik... 'n nuwe lewens les

My liefste klein Superman....

Mamma besef elke dag al hoe meer, hoe kosbaar tyd saam met jou is. Jy is nou te ougat... Jy is 22 maande oud... ampertjies dan is jy al 'n volle 2 jaar oud... Waar het die tyd heen gegaan? Ek het verlede week met 'n skok agtergekom, een van die dae, is jy nie meer my babatjie nie... Jy het begin met jou potty training. Ai, mamma kry skoon 'n knop in my keel. Ek wil nie hê jy moet groot word nie. Mamma wil hê jy moet vir altyd klein bly, want op die stadium is ek nog so belangrik in jou lewe. Jy kom sit op my skoot met elke kans wat jy kry. Jy huil vir my om jou op te tel, wanneer jy net bietjie aandag en liefde soek. Jy speel en hardloop al om my as ek doenig in die kombuis is. Ek gaan die dae mis wat jy die tupperware kas uitpak as mamma in die kombuis besig is met kos maak. Dis hoe mamma dit soek, vir altyd. Maar, soos ons Pastoor sondag gesê het, God se woord sê ons moet kinders van God groot maak. Jy moet groot word my kind, ek weet...

My skrywe gaan vandag oor alles wat nuut begin... Mag jy altyd onthou, daar is altyd iets nuut wat wag.... 'n nuwe dag... nuwe uitdagings. Om foute te maak is menslik, dis hoe mens leer en sterk word. Ek hoop jy sal altyd onthou, mens kry 'n tweede kans, maak nie saak wat nie.

Ons het al soveel deurgegaan my kind. Jou klein lyfie, wat dien as 'n tempel van God, het al die onmoontlike oorkom. Jy is 'n bewys dat God se woord leef.... Dat daar regtig so iets soos wonderwerke is. God het jou gespaar my kind vir 'n rede... Ek kan nie wag om te sien watter pad God vir jou uitgekerf het nie. Dit gaan 'n eer wees, om jou mamma te wees gedurende die tyd wat jy die pad gaan stap om in 'n man te verander. Dit gaan so amazing wees! Deur jou lewenspad, gaan jy, jou eie Goliat oorwin!

Mamma het al so baie geleer en ek leer elke dag iets nuut. Daar is nie 'n boek wat mens kan koop om 'n perfekte mamma te wees nie. Jy my seun, is my eerste. Mamma voel soms hulpeloos en dom, maar dan onthou ek, elke dag is 'n nuwe dag. Wanneer dit nie 'n lekker dag is nie, en ek nie seker is watter kant toe nie, leer mamma 'n nuwe les. Hoe meer jy begin gesels en met jou handjies wys, hoe meer leer mamma om jou te verstaan. Dis so lekker as jy by my sit en gesels. Ons maak sommer ons eie storie op soos die geklets aangaan. Jou skreeu laggie wanneer ons sommer net begin sing en kielie is die klanke wat hierdie moeder hart vinniger laat klop. Jy is pragtig my kind.

Een van my grootste vrese vandag is, dat jy eendag iewers gaan seer kry. Mamma wens ek kon jou beskerm met elke treetjie wat jy gee. Mamma wens sy kan al jou hartseer keer wat nog gaan kom soos jy groter word. Maar mamma kan nie my kind... Om te lewe, is 'n onbeheerbare leer proses. Jy gaan seer kry, en dan gaan daar oomblikke wees wat jy so gelukkig is, dit gaan voel of jou lewe in 'n oormaat gebless het. Jy gaan leer hoe dit voel om iemand te verloor.... Hoe om te sien hoe God iemand nuuts in jou lewe stuur, want Hy sal nooit iemand net wegvat en nie iemand beter en meer waardig stuur nie. Het jy geweet die dag toe Oupa Janna dood is, het ek vir Pappa gesê, wanneer mens iemand verloor, stuur God weer iemand om jou lewe te vervul... 'n paar maande later toe vind ons uit, jy is oppad. Hoe amazing is dit nie?

Solank as wat mamma kan, sal mamma elke paadjie saam met jou stap en elke berg uit klim. Mamma sal altyd probeer raad gee, probeer keer vir onnodige seer, maar die pad vorentoe, is wat jou gaan maak wie jy word... Belowe mamma asb altyd dat jy; -

♥ NOOIT OOIT MOED SAL OPGEE NIE. Maak nie saak wat nie, jy hou aan my kind met alles wat jy het!

♥ MOET NOOIT DIE KRAG WAT JYSELF BINNE IN JOU HET ONDERSKAT OF VERGEET NIE. Glo altyd in jouself, maar meeste van alles, glo altyd in ons Hemelse Vader. En wanneer jy verlore of moedeloos voel, onthou Gebed en Geloof bring krag! Maak jou ogies toe en bid my kind! God luister altyd.

♥ MOET NOOIT VERGEET JY IS 'N KIND VAN GOD NIE! Mamma kan dalk jou trane afvee en 'n pleister op plak, maar God maak die seer plekkie beter.

♥ MENSE SAL JOU ALTYD SEERMAAK. Of hulle dit nou bedoel of nie. Dis ongelukkig deel van die lewe my kind. Probeer jy net altyd om nie iemand ander seer te maak nie. Wees altyd bedagsaam teenoor ander. Jy my kind, is 'n engel. Wees 'n engel ook vir ander.

♥ DIE LEWE SAL ONS ALTYD TOETS. Moenie bekommer nie, met God aan jou kant, slaag jy daai toets sommer in 'n japtrap! Elke toets en elke gebeurtenis maak jou hartjie sterker. Dit bou jou menswees. Dit sal jou altyd verander in iemand met hoop. Moet nooit ophou hoop en glo nie. God het altyd 'n plan!

♥ WEES ALTYD LIEF VIR IEMAND. Of dit nou ek of Pappa, boetie of sussie is.. Of dalk die meisie wat jou hartjie nog eendag gaan steel... Wees altyd lief vir iemand. Dit sal jou voete op die grond hou en jou herhinner aan oneindige geluk. Liefde is geluk my kind, deel jou liefde met jou medemens.

Maar vandag wil mamma jou vra, onthou asseblief altyd dat die grootste geskenk wat God ons kon gee, is die Wil om altyd voort te gaan. Maak nie saak hoe seer of hoe moeilik dit is nie. En weet net, daai Wil wat jy altyd in jou hart sal voel, groei uit die fondasie van hoop en liefde uit. Sonder hoop en liefde, sal jou geloof nooit kan blom nie. Vertrou op God, bid elke dag en gaan kuier vir God in die kerk. Jy sal verbaas wees, hoeveel ongelooflike mense jy op sulke dae kan ontmoet.

Mamma is so oneindig lief vir jou. Jy is my geskenk. My rede vir elke oggend se opstaan... Die rede vir hierdie liefde in my hartjie wat ek nooit geken het nie. Ek dank God elke dag, want sonder jou sou my lewe leeg wees.

Lief jou vir altyd en nog 'n bietjie meer!

Jou mamma

xxx

Jou Pappa... My held, my man, my beste vriend....

Vandag wil mamma jou vertel, van Pappa...

Eendag, wanneer jy groter is, sal jou liefde en
persoonlikheid, diè weerspreek van pappa, want jy my kind, is in alle opsigte, nes pappa.

Pappa is nie 'n man van vele woorde nie...  Hy weet nie altyd hoe om te gesels oor dinge wat regtig saak maak nie, maar hy is beslis iemand wat wys deur sy aksies hoe oneindig lief hy iemand het. Eendag as jy groter is, sal jy besef, dat alles wat Pappa doen, doen hy vir jou... vir sy gesin.

Pappa se trots word weerspreek deur sy kinders... Jy, boetie en sussie. Sy kinders is sy lewe, sy bestaan en sy rede. Pappa sal enige iets vir jou doen my engel kind. Moet nooit ooit twyfel daaraan of jy iets met hom kan bespreek of nie. Pappa gee goeie raad en is al deur so baie in sy eie lewe. Pappa sal baie beter verstaan, as wat jy dink. Moet nooit bang wees om met Pappa te praat oor enige iets nie.  Pappa sal altyd daar wees vir jou, dag of nag, enige tyd...

Hy is 'n rots, 'n beste vriend, 'n mentor. Hy is alles, wat ek hoop jy eendag sal wees. Hy weet wanneer jy seer het, en op sy eie manier, sal hy dit beter maak... So klein soos jy is, is pappa klaar jou held. Jy gesels al te lekker en so tussen deur jou baba taal, is al wat mens hoor "pappa" dit of "pappa" dat...

Eendag, wanneer jy kinders van jou eie het, gaan jy sê, "My pa was lief vir ons." Jy sal dit elke dag kan sien in sy gesig, sy aksies en sy woorde...
Jy gaan kan sê, "My Pa was lief vir my Ma." Want Pappa is regtig. Ek het 'n man en 'n beste vriend in jou Pappa. Pappa is nooit lelik met my nie, verskree my nie, misbruik my nie. Pappa het my nog altyd net met die grootste respek hanteer en wanneer mamma se hartjie soms seer is, maak Pappa dit altyd soveel beter met sy drukkies. Pappa is regtig 'n goeie man, een wat ek hoop jy eendag sal wees vir jou vrou.

Jy sal altyd kan sê, "My Pa was eerlik en hardwerkend." Pappa sal altyd eerlik met jou wees. Weet jy soms, kom Pappa by die huis, dan is sy hande so gevlek en vol seer plekke, want hy werk baie hard vir ons. Pappa weet wat die waarde daarvan is, om hard te werk en glo vir my, Pappa was nog nooit bang vir hard werk nie. Dis iets wat ek hoop jy ook sal aanleer.

"Pappa is 'n goeie vriend." Pappa gaan nog jou beste vriend wees. Jy was skaars een jaartjies oud, toe koop Pappa al vir jou, jou eerste Quadbike... Nie omdat hy geld wou mors nie, maar so klein soos jy is, is dit jou en Pappa se stokperdjie. Pappa sal altyd tyd maak vir jou my kind, sodat hy dinge saam met jou kan doen. Dis jou en pappa se kwaliteit tyd saam. Koester daai oomblikke altyd en moet dit nooit vergeet nie.

Jy gaan eendag sê "My pappa help ander mense altyd en is vrygewig." Pappa sal altyd iemand help, maak nie saak hoe groot of klein die situasie is nie. Pappa sal altyd sy tyd en as dit moontlik is, sy geld gee vir iemand wat dit meer nodig het.

"My pappa 'love life' en het altyd hoop." My kind, jou Pappa lewe vir elke oomblik van sy lewe saam met sy gesin en familie.... die groot en klein oomblikke. Jy sal eendag besef, Pappa se hoop was vir altyd... Sy hoop vir sy kinders, sy gesin en familie sal altyd wees; net vir almal om gelukkig te wees. Pappa glo altyd, hoop, geloof en liefde oorwin alles. Pappa het my dit geleer. Mamma staan nou nog daarby.

Pappa wil altyd net die beste vir jou hê. Wanneer Pappa raas, is dit omdat hy omgee en lief is vir jou. Pappa sal altyd na jou kyk en vir jou sorg. Pappa sal altyd seker maak om jou te bederf en jou na plekke toe vat waar julle kan visvang en swem. Pappa sal altyd seker maak jy het mooi goed, speel goed en genoeg van alles. Dit belowe ek jou.

My kind, ek hoop eendag jy weet, hoe spesiaal jou Pappa is. God het Pappa gekies vir jou... God het geweet, dis jou Pappa en jy is sy seun. Pappa is jou geskenk van God af. Onthou dit altyd en respekteer jou Pappa.

Pappa is nie selfsugtig nie. Met Pappa gaan dit oor hoe meer jy gee, hoe meer kry jy terug. Pappa sal altyd vinnig vergewe vir wanneer jy stout was, of wanneer jy dalk nie jou huiswerk gedoen het nie. Pappa hou nie van kwaad wees nie, nog minder van baklei. Moet nooit dink Pappa is sommer net kwaad vir geen rede nie. Pappa het 'n baie sagte hartjie. Waardeer Pappa altyd.

My kind, jou Pappa droom groot drome vir jou, al is jy nog so klein. Pappa sal altyd in jou glo, selfs wanneer jy soms nie eers voel, jy kan in jouself glo nie. Pappa sal altyd reg langs jou wees, jou aanmoedig om nie op te gee nie. Want dis wat Pappas doen.

Pappa lief jou so baie my klein superman. Moet nooit ooit twyfel in Pappa nie. Dis die beste en enigste Pappa wat jy ooit sal hê.

Lief jou vir altyd en nog 'n biejtie meer my engel kind.

Jou mamma
xxx

My Superman... Jy is my hero!

My liefste klein Superman...

Dis al meer 'n jaar terug, wat mamma daai oproep gekry het. Ek kry skoon hoendervleis as ek dink aan daai oggend. Ek dink nie dis 'n dag wat ek ooit sal vergeet nie. Ek het gejaag om so gou as moontlik by jou uit te kom. Ek was daar, nog voor die ambulans jou gebring het. Ek het die vorms probeer invul, maar my hande het so gebewe, ek kon nie eers my eie handskrif erken nie.... Wanneer 'n mamma so hulpeloos voel, is dit asof jou lewe tot 'n stilstand kom. Jy hou op asemhaal vir 'n paar oomblikke, sonder dat jy eers besef.

Wat die seerste gemaak het, dit was amper 2 ure voor ek jou kon sien... Die dokters wou ons nie toelaat by jou nie. Juffrou  het vir my verduidelik dat jy twee keer ophou asem haal het... My hart het amper gaan staan. Ek onthou nie wat sy verder gesê het nie, ek het net begin huil... Ek het pappa heeltyd gebel. Ek het gehuil, geskree, gebid. Ek het God gesmeek om jou te spaar.

My grootste wens is, dat jy eendag sal besef, hoe spesiaal jy is... Jy is so spesiaal, dat God besluit het, jou plekkie op aarde is nog lank nie bespreek vir die hemel nie. Jy my kind, is gespaar en gesond gemaak vir 'n rede... Ek natuurlik glo, dis omdat jy die mees kosbaarste geskenkie is, wat ek al ooit ontvang het. Ek dink nie ek sou survive sonder jou nie. Ek dink God het geweet, ek sou nie ooit weer kon lewe, sonder my kind nie. Jy was en is steeds so mooi kind. Ek onthou toe jy gebore was, kon ek nie glo jy is so mooi nie. Ek was skoon bang om jou vas te hou. Ek het bang gevoel, opgewonde, maar bang. 

Jy is net 18 maande oud, maar weet jy hoeveel het jy al deurgemaak my kind? Met jou geboorte was dit nie maklik vir mamma nie... Na vele komplikasies, moet hulle my narkose gee en ek het so gehuil, want ek wou wakker wees wanneer jy die eerste keer jou verskyning maak. Maar mamma kon nie. Pappa het heeltyd langs ons bed gestaan en toe jy gebore is, het pappa elke sekonde langs jou bedjie spandeer. Jou vertroetel, jou gesiggie leer ken en soos ek pappa ken, heeldag gebedjies opgesê vir God om jou vir altyd te beskerm en te omvou. 

Mamma, kon daai aand, (jy was 8 uur die oggend gebore) jou vir die eerste keer vashou. Ouma het my wakker gemaak en gesê: "Mamma jy moet vir Marlo bietjie vashou. Hy moet jou vel teen sy vel voel sodat julle 'n band kan hê." Tot vandag toe nog is ek so dankbaar dat ouma daar was. Sy was so opegewonde om jou te ontmoet. En weet jy, tot vandag toe, aanbid sy die grond waarop jou twee klein voetjies loop. Ouma, bederf en liefies jou elke keer in oorvloed wanneer julle tweetjies saam is. Jy moet dit waardeer my kind, ouma's is die spesiaalste mensies op aarde. 

En toe, net so bietjie meer as 'n jaar terug, het mamma die seerste seer beleef, denkbaar. Jy my kind, het verstik by die kleuterskool. Ek wens vir geen mamma, daai pyn, seer en onsekerheid om te sien hoe jou kleintjie vir sy lewe veg nie. Jy het terug baklei my kind! Eendag, wanneer jy groot is, sal mamma vir jou al die boodskappies wys wat mense vir jou gestuur het. Sommige mense wat ons nie eers ken nie het vir jou gebid... vir ons. 

En dis hoekom jy, so klein soos jy is, my hero is... Jy het die ontmoontlike oorwin... Jy het aan my bewys, dat maak nie saak hoe erg die situasie is nie, opgee is nooit 'n opsie nie. Ek weet nou, dat God se woord leef... Wonderwerke gebeur... Hoop, geloof en liefde maak enige iets beter. Solank jy vashou aan daai waardes my kind, sal jou lewe altyd volmaak wees. 

Mamma is baie lief vir jou my Superman! Vir altyd en nog 'n bietjie meer. Ek belowe.